Сулайманов Аскат Калыбекович

Сулайманов Аскат Калыбекович

1978-жылдын 27-майында Ыссык-Көл обл. Балыкчы шаарында төрөлгөн. 1995-1999-жылдары  Алмата шаарындагы Т.Жургенов атындагы Казак мамлекеттик театр жана кино институтунунда окуп бүтүргөн. 1999-жылдан тартып КУАДТнын артисти. 2010-ж. Ч.Айтматов атындагы Мамлекеттик Жаштар сыйлыгынын лауреаты. КР Ардак грамотасынын ээси. Аскат Сулаймановдун 27 жылдык чыгармачылык жолу - актердун сахнада тынымсыз изденип, улам жаңы мүнөзгө, жаңы дүйнөгө кирип келген узак жана жемиштүү жол. Анын репертуарына көз чаптырганда эле бир калыпка сыйбаган актердук табиятын байкоого болот. Ал тарыхый инсандарды да, дүйнөлүк классиканын каармандарын да, замандаштарыбыздын образдарын да, комедиялык мүнөздөрдү да сахнада эркин алып жүрө алган актер.

Ж. Садыковдун «Ормон ханындагы» Калыгул чечен, Т. Абдумомуновдун «Алдар Көсөөсүндөгү» Алдар Көсөө, А. Пароняндын «Багдасар акесиндеги» Багдасар, Ш. Башбековдун «Темир аялындагы» Кочкорбай, К. Иманалиевдин «Керээзиндеги» Жангарач бий, Т. Актановдун «Тагай бийиндеги» Саид хан -  актердун чыгармачылык жолундагы ар башка мезгилди, ар башка мүнөздү камтыган образдар. Бул каармандардын ар биринде актер бирин экинчисине окшотпой, алардын өзүнө таандык жүрүм-турумун, ой жүгүртүүсүн, ички темпераментин табууга умтулат.

Аскат Сулаймановдун сахналык табиятында кыймыл, темперамент жана мүнөздүүлүк өзгөчө орунда турат. Комедиялык образда ал көрүүчүнү күлкүгө жетелесе, тарыхый каармандарында сөздүн салмагын, бийликтин сүрүн, мезгилдин демин берүүгө аракеттенет. Ал эми драмалык ролдордо каармандын ички карама-каршылыгын, адамдык санаасын ачууга басым жасайт. Ушундай жанрдан жанрга, мүнөздөн мүнөзгө эркин өтө билүүсү анын актердук мүмкүнчүлүгүн кеңейтип, сахнадагы чыгармачылык жүзүн калыптандырды.

Айрыкча, анын чыгармачылык өмүр баянында кыргыз тарыхына жана улуттук драматургияга байланышкан каармандардын өзүнчө орду бар. Осмон бий, Үрбү хан, Калыгул чечен, Саурык, Жангарач бий, Саид хан сыяктуу образдар аркылуу актер ар башка доорлордун адамдарын сахнага алып чыгып, алардын мүнөзүн бүгүнкү көрүүчүгө жеткирүүгө аракет кылды. Ошол эле учурда Шекспир, Мольер, Гоголь, Чехов, Ионеско, Булгаков, Шницлер, Н. Хикмет сыяктуу дүйнөлүк драматургдардын чыгармаларында ойношу анын чыгармачылык чөйрөсүнүн канчалык кенен экенин көрсөтөт.

Жыйырма жети жыл бою бир театрдын сахнасында ондогон тагдырларды жашап өтүү - актер үчүн чоң чыгармачылык мектеп. Ушул мезгил ичинде Аскат Сулайманов эпизоддук ролдордон тартып спектаклдин негизги жүгүн көтөргөн борбордук образдарга чейин жетип, театрдын репертуардык тарыхы менен кошо өсүп, чыгармачылык жактан бышып жетилди. Ар бир жаңы роль анын актердук тажрыйбасына жаңы боёк кошуп, сахнадагы мүмкүнчүлүгүн улам кеңейтип келди.

Аскат Сулаймановдун чыгармачылыгы театр сахнасы менен гана чектелбейт. Ал кино тармагында да үзүрлүү эмгектенип, экранда жараткан ондогон образдары аркылуу кеңири көрүүчүлөргө таанылды. Сахна менен экранды катар алып жүрүп, 27 жылдык чыгармачылык өмүрүндө өзүнө таандык актердук мүнөзүн калыптандырган Аскат Сулайманов - бүгүнкү кыргыз театр искусствосунда өз орду бар, чыгармачылык дарамети мол актерлордун бири. 

Ролдору: 

Ж. Садыков – «Өмүр жана өкүнүч» – Осмон бий
Т. Касымбеков, К. Сактанов – «Курманжан датка» – Жаркынбай
У. Шекспир – «Гамлет» – Көрчү
Т. Уильямс – «Кыялым азабым» – Стив
Ж. Садыков – «Адам жана Азезил» – Кабыл
К. Акматов – «Азаттыгым арманым» – Жылкычы
У. Шекспир – «Антоний жана Клеопатра» – Чабарман
Ж. Садыков – «Айкөл Манас» – Үрбү хан
Ж. Садыков – «Манастын уулу Семетей» – Жигит башы
Ж. Садыков – «Ормон хан» – Калыгул чечен
Н. Мендебаиров – «Жомоктор дүйнөсүндө» – Маугли
О. Уайльд – «Жылдыздуу бала» – Стражник
М. Козукеев, Н. Мендебаиров – «Кукломекс» – Кукла
А. Чекиров – «Куйручук…» – Көр казгыч
Б. Жакиев – «Атанын тагдыры» – Борбук
М. Тойбаев – «Эрте өчкөн жылдыз» – Бейтааныш жигит
А. Шницлер – «Сүйүү айлантмасы» – Бизнесмен
М. Карим – «Ай тутулган түндө» – 3-чал
М. Козукеев – «Принцесса Бенд-Закинджа и ее маскарапоз» – Хужбай
М. Булгаков – «Зойканын квартирасы» – Аллилуйя
С. Алтымышов – «Таң булбулу» – Найзабек
К. Зарлыкова – «Сибирь челноктору» – Акын жигит
Т. Абдумомунов – «Алдар Көсөө» – Алдар Көсөө
М. Абылкасымова, К. Иманалиев – «Атаке баатыр» – Саурык
Ж. Б. Мольер – «Анткор оорулуу» – Де Бонфуа
А. Паронян – «Багдасар аке» – Багдасар
С. Ахмад – «Күйөө бала» – Жоробай
Б. Жакиев – «Жолугушуу» – Күйөө жолдош
Э. Ионеско – «Макбет» – Макколь
Ч. Айтматов – «Чынгызхандын ак булуту» – Жоокер
Т. Теменов – «Алма багы» – Марат
Б. Калчабаева – «Баяндуу махабат» – Кудайберди
Н. Хикмет – «Унутулган адам» – Малай
У. Шекспир – «Король Лир» – Француз королу
А. Темирова – «Сынык асман» – Жигит
Э. Радзинский – «Жаза» – Эркек
Н. Гоголь – «Үйлөнүү» – Анучкин
А. Асангулова – «Бурулча» – Үрүстөмбек
Ш. Башбеков – «Темир аял» – Кочкорбай
К. Иманалиев – «Керээз» – Жангарач бий
Э. Леман – «Вестсайд окуясы» – Милиция
А. Чехов – «Кичинекей адамдын чоң трагедиясы» – Пискарев, Тергөөчү, Ашпозчу
Т. Актанов – «Тагай бий» – Саид хан